Ако досега не сте имале ковид, веројатно немате ни пријатели, тврди еден од главните јужнокорејски лекари, кој својата Facebook објава ја избриша откако истата предизвика низа негативни коментари.
„Возрасните кои не биле заразени со ковид имаат проблеми во меѓучовечките односи“, напиша на Facebook Ма Сан Хјук, потпретседател на јужнокорејското Здружение за вакцинација.
Неговите коментари, кои почнаа со огромна брзина да се шират на социјалните мрежи, предизвикаа низа критики од луѓето кои досега не се заразиле со коронавирусот, а не се сметаат за асоцијални личности.
Доктор Ма подоцна го избриша постот, тврдејќи дека се послужил со метафора, а луѓето не го разбрале добро.
„Сакав да истакнам колку е тешко да се избегне вирусот во ситуација со висока стапка на заразени во близина“, наведе Ма.
Претходно, Бренда Крабтри инфектолог од Мексико, во една статија напиша:
„Ако сега немате пријатели кои се заразени, немате пријатели“.
И двете изјави се дадени во време кога нивните земји беа погодени од нов бран на коронавирусот, предизвикан од сојот омикрон.
