Фантастичниот Бразилски фудбалер и член на Орландо Сити синоќа го одигра последниот натпревар во својата кариера.
Во последно време доста се шпекулираше околу неговата иднина, а Кака на крај одлучи дека е време да стави крај и да замине во фудбалска пензија.
Капитенот на Орландо Сити ја предводеше својата екипа во натпреварот против Колумбос Крју, кој го добија со 1:0, а Кака не можеше да ги сокрие емоциите.
„Денес беше посебен ден за мене, цел ден размислував за последните три години и околу тоа што се случи. Денес и се заблагодарувам на сите, на клубот, соиграчите, ќе ми недостигате. Ќе останам Лав засекогаш“, изјави Кака.
Какa има 35 години, кариерата ја започна во Сао Паоло, каде дебитираше за првиот тим. Во 2003 година направи трансфер во Милан каде остана до 2009 година и се стекна со светска фудбалска слава демонстиррајќи ѓи своите вештини и мајстории.
Во 2009 година направи трансфер во Реал, каде остана до 2013 година, за потоа повторно да се врати во својот Милан и остана таму уште една година.
Од тогаш игра за Орландо Сити, а кратко беше на позајмица во Сао Паоло.
Исто така, настапуваше и за младинската и сениорската репрезентација на Бразил.
Со Милан ја освои Серија А, Лигата на шампионите, УЕФА Супер Купот и Светското клупско првенство.
Во Реал исто така освојуваше титули, во 2011 го освои Купот на Кралевите, а Суперкупот и Ла Лига ги освои во 2012 година.
Со репрезентацијата на Бразил го освои Светското првенство во 2002 година.
