За да помине низ познатиот „зелен пекол“ на еден од последните спортски автомобили од старата школа (атмосферски мотор, рачен менувач и погон на задните тркала) му беа потребни 8 минути и 27,270 секунди.
Вистина е дека Coupé GR86 на Toyota не е меѓу најбрзите автомобили кои се соочиле со стоперката на познатата герамнска патека Нирбургринг Нордшлајфе, но во случајов многу поголема тежина има изјавата на Кристиан Гебхарт (новинар и тест-возач на германскиот магазин Sport Auto) кој по „затворањето“ на најбрзиот круг рече дека GR86 спаѓа меѓу најзабавните автомобили кои досега ги возел на Нирбургринг. А, има возено навистина многу.
Управувајќи го еден од последните спортски автомобили од старата школа, кој со себе носи атмосферски boxer мотор, рачен менувач и погон на задните тркала, Гебхарт низ „зелениот пекол“ мина за 8 минути и 27,270 секунди, што е значително подобро од времето кое го оствари моделот од првата генерација (GR86) кому за истиот круг му беа потребни 8 минути и 44,900 секунди.
За потсетување, GR86 го покренува 2,4-литарски атмосферски 4-цилиндричен boxer мотор на Subaru кој развива 235 коњски сили при 7.400 вртежи во минута и 250 Nm најголем вртежен момент при 3.700 вртежи во минута, што е доволно за забрзување од 0 до 100 километри на час за 6,3 секунди и 225 км/ч.
