Мултимилионскиот потфат за истребување на глувци од јужноатлантскиот остров Гаф, со цел заштита на морските птици, тотално потфрли, ставајќи ги во очај протагонистите за конзервација на островот.
Зафрлениот и ненаселен остров, порано познат како остров Гонсалу Алвареш, прогласен за светско наследство на УНЕСКО, долго време бил слободен од предатори и тоа по природен пат. Поради тоа служел како рај за милиони морски птици. Сето тоа нагло се променило откако глувци се населиле на островот некаде во 19 век, веројатно ненамерно донесени од морнари. Таквиот развој на настаните го претворил островот од рај во хорор за птицити бидејќи глувците се хранат со младенчињата, загрозувајќи го опстанокот на некои видови, вклучително и сега веќе загрозените видови како Тристан албатроси и МекГаливреј приони.
Ситуацијата која од ден на ден стануваше сѐ полоша и полоша резултираше со лансирање на огромен проект за комплицирана логистичка елиминација на глувците. Финансискиот трошок за овој мегапроект достигна 9,1 милиони долари, од кои 5 милиони биле добиени преку донации.
Изминатово лето населените птици беа внимателно пренесени од островот од страна на специјалисти, за хеликоптери да можат да истурат големи количества родентицид низ целиот остров, кој е со површина од 91 квадратен километар. Операцијата опишана како „една од најамбициозните програми за реставрација на остров некогаш воведена“, се сметаше за успешна, сѐ до овој вторник.
На 14 декември тимот за реставрација на островот Гаф извести дека „разочарувачки е да објавиме дека по операцијата за уништување на глувците годинава, веќе забележан е глушец преку опремата за мониторинг поставена на островот“.
Конзерваторите признаваат дека се „длабоко вознемирени од овие вести“ бидејќи отстранувањето на секој глушец од островот беше клучно за да се „спречи загуба на повеќе од два милиона морски птици младенчиња и јајца на годишно ниво“ и да се заштитат загрозените видови од истребување. Потенцираат дека и покрај тоа што досега само еден глушец е откриен, нивното искуство вели дека „малку е веројатно дека е само еден“.
Тимот за реставрација на островот Гаф и натаму продолжува да го надгледува островот и да врши проценки на ситуацијата.
