Властите во централната провинција Утрехт во Холандија ја отворија најдолгата соларна велосипедска патека во светот која произведува електрична енергија, поврзувајќи ја одржливата енергија со транспортот со нулта емисија на штетни гасови.
Учениците од локалното основно училиште први се повозија на патеката долга 330 метри, која се наоѓа во селото Маартенсдијк, во близина на Утрехт. Патеката се состои од бетонски блокови покриени со тенок транспарентен слој кој штити и овозможува сончева светлина да навлезе во соларните ќелии вградени во блоковите.
Пилот-проектот има за цел да утврди дали таквите патеки со двојна намена би можеле да се користат пошироко, односно дали може да им служат на велосипедистите и дали може да се користат за производство на електрична енергија од сончева енергија, имајќи предвид дека провинцијата Утрехт сака да ги намали емисиите на јаглерод.
„Многу е важно! Сакаме да бидеме климатски неутрални до 2040 година, затоа мора да се осмелиме да користиме иновации, и ова е многу иновативно. Имаме многу набиена провинција со малку простор, па од таа причина мораме да ја пробаме двојната намена на патеките. Ако можеме да ги искористиме патиштата за производство на енергија, имаме двојна предност“, рече Арне Шадели, провинциски службеник.
Соларната велосипедска патека беше отворена на денот кога Европската Унија претстави сеопфатен сет на закони кои треба да ѝ овозможат да го исполни ветувањето за намалување на емисиите на глобално затоплување за 55 проценти во текот на деценијата, вклучувајќи го и контроверзниот даночен план за странските компании што предизвикуваат загадување.
Соларни велосипедски патеки веќе се користат во други делови на Холандија, но оваа во Утрехт е најдолгата.