Јужна Кореја потпиша договор вреден 43 милијарди долари за изградба на оф-шор фарма со ветерници.
Новата фарма би можело да биде седумпати поголема од моментално најголемата во светот. Целиот проект е вреден 43 милијарди долари, а целта на рекордната фарма со ветерници е да се постигне карбонска неутралност до 2050 година.
Целта на карбонската неутралност како процес е да се достигне нулта јаглеродно влијание односно zero carbon footprint. Најдобриот начин за спроведување карбонска неутралност е да се намали зависноста од фосилните горива или да се преземат активности кои би почнале да го намалуваат количеството на јаглерод диоксид во атмосферата.
Овој договор ќе ѝ помогне на Јужна Кореја да ги надмине енергетските предизвици бидејќи има малку извори на енергија и увезува јаглен за да генерира околу 40 проценти од својата електрична енергија. Претседателот Мун Џае-ин рече дека географската местоположба на Корејскиот Полуостров претставува предност за одржливата енергија.
„Имаме неограничен потенцијал на ветер на море од три страни, а исто така ја имаме и најдобрата технологија во светот во сродни области“, рече Мун.
Јужна Кореја сака да го намали, а потоа и целосно да го укине секторот за нуклеарна енергија, така што земјата ќе биде зависна од обновлива енергија.
Изградбата на фармата со ветерници е планирана во регионот на југозападниот дел на Кореја, далеку од брегот на Синан. Мун, исто така, рече дека фармата се очекува да биде седум пати поголема од моментално најголемата оф-шор фарма.
Максималниот капацитет на новата фарма со ветерници ќе биде 8,2 гигавати, а изградбата треба да започне за пет години.
Јужна Кореја планира да го намали бројот на нуклеарни централи од 24 на 17 до 2034 година, што ќе ја зголеми потребата за нови извори на енергија. Се очекува сите овие потреби да ги задоволи големата оф-шоф фарма со ветерници.