Додека беснее војната во Украина, НАТО и сојузниците во понеделник ќе почнат со воени вежби во Норвешка, планирани пред да се случи руската инвазија во Украина.
Околу 30.000 војници, 200 авиони и 50 бродови од 27 земји ќе учествуваат во вежбата наречена Cold Response 2022, најголемата на НАТО годинава.
Маневрите ќе им овозможат на НАТО членките да ги усовршат борбените вештини во студената норвешка клима, вклучително и Арктик, на земја, на море и на небо, пренесе AFP.
Вежбата ќе се одржи неколку стотици километри од руската граница. Иако беше планирана пред инвазијата во Украина, сега доби и дополнително значење поради војната.
„Оваа вежба е исклучително важна за безбедноста на Норвешка и нејзините сојузници. Ние ќе вежбаме сојузничко засилување на Норвешка“, изјави за AFP норвешкиот министер за одбрана Од Рогер Еноксен.
Нагласи дека вежбата не се одржува поради нападот врз Украина. Норвешка сака да тестира како ќе управува со сојузничките засилувања на нејзина територија, во склад со член 5 од повелбата на НАТО кој бара од државата членка да притекне во помош на друга држава членка, која е нападната.
Соседните Шведска и Финска, кои официјално се воено неутрални, ќе учествуваат во вежбата која ќе заврши на 1 април.
За да се избегне какво било недоразбирање, Норвешка ја извести Русија за оваа вежба дефинирана како чисто дефанзивна, затоа што маневрите ќе се одржат на одредена оддалеченост од руската граница.
Русија го одби повикот да испрати свои набљудувачи додека трае воената вежба.
