УФЦ се врати по многу шпекулации и преговарања, на големо задоволство на фановите. Во саботата се одржа првата борба по прекинот поради пандемијата, меѓу Тони Фергусон и Џастин Гејџи.
Хабиб Нурмагомедов му испрати порака на Фергусон откако Американецот беше поразен од Гејџи на настанот УФЦ 249.
Откако борбата со Дагестанецот по петти пат беше одложена – овојпат поради пандемијата – Фергусон реши да влезе во октагонот против Гејџи, но беше поразен. Гејџи беше подобар противник во сите пет рунди, а борбата беше решена со технички нокаут во петтата рунда.
По мечот, Хабиб му упати утешни зборови на Фергусон, кој сега ќе мора да го гледа соочувањето на дагестанскиот ММА борач со Гејџи за појасот во лесна категорија.
„Што и да се случи, тоа останува во минатото. Главата горе, Тони. Се надевам дека ти и твоето семејство сте добро. Кога син ти ќе порасне, ќе се гордее со тебе“, му напиша Нурмагомедов преку Twitter.
Гејџи, пак, одвај чека да се пресмета со Дагестанецот. По победата против Фергусон доби привремен појас кој веднаш го тргна и порача дека го сака „оној вистинскиот“ што го има Хабиб.
Дагестанецот, кој не настапува бидејќи не смее да излезе од земјата поради мерките за заштита од пандемијата со COVID-19, прво на Twitter на тоа одговори со „Без коментар“, но не издржа и се огласи подоцна на Instagram:
„Во овој спорт, а особено во оваа категорија, секогаш ќе има млади лавови кои ќе ви дишат во врат. Ако се опуштите, ќе изгубите. Едни заминуваат, други доаѓаат и тоа не е никакво изненадување. Но, јас нема да паднам без испукан куршум. Ќе се бориме.“