Хрватската репрезентација успеа да се пласира на шестото по ред Европско првенство откако синоќа на „Максимир“ во Загреб ја совлада Ерменија со минимални, но доволни 1:0.
Во последниот натпревар од евроквалификациите на „Ватрените“ им требаше победа за да го потврдат пласманот на големото натпреварување, а на крајот завршија на второто место во групата Д зад Турција, која синоќа ремизираше со Велс на гостински терен играјќи 1:1. Токму Велс целеше на местото на Хрватска.
Момците на Златко Далиќ од самиот почеток почнаа јуриш кон голот на Ерменците. Гостите долго време успешно се бранеа, па дури имаа и две добри шанси да поведат од контранапад, но не успеаја.
Отпорот на Ерменците беше скршен во 43. минута кога Анте Будимир постигна гол со глава по центаршутот на Борна Соса од левата страна за 1:0.
Ова им обезбеди мирно продолжение на натпреварот на Хрватите, кои лесно го контролираа и рутински забележаа триумф со кој им беше запечатен билетот за Германија.
И покрај неколкуте можности за нов гол во кои се најдоа популарните „Ватрени“, резултатот остана 1:0 до крајот.
Со пласманот на Хрватска познати се сите 20 репрезентации кои преку квалификациите обезбедија пласман на завршницата. Останатите три ќе се добијат преку баражите од Лигата на нации во март.
Потсетуваме, Хрватска го пропушти ЕУРО 2000 одржано во Белгија и Холандија, а потоа се пласираше на секое првенство на Стариот континент што се играше (2004, 2008, 2012, 2016 и 2020). По отцепувањето од Југославија играше и на ЕУРО 1996 во Англија.
