Севернокорејскиот лидер Ким Џонг Ун редовно оди во инспекција на локациите на неговиот амбициозен градежнички проект.
Тој повика на дополнителни напори за забрзување на развојот на домувањето во земјата, што планира да го реализира со проектот за изградба на 50.000 нови станови во Пјонгјанг.
Reuters известува дека државната агенција KCNA објави дека Ким ја потенцирал важноста на домувањето за време на оваа посета и рекол дека ова е еден од итните проблеми што треба да се решат и со кои ќе се подобри животниот стандард на граѓаните.
Агенцијата наведува дека севернокорејскиот лидер минатата недела официјално ги отворил градежните работи за изградба на првите 10.000 станови во главниот град Пјонгјанг, и покрај економската криза и меѓународните санкции, поради што доцнат многу други градежни проекти во земјата.
Ким се фокусира на домашните економски проблеми само една недела откако Северна Кореја лансираше две балистички ракети во морето близу Јапонија, потенцирајќи го напредокот во нејзината програма за оружје и со тоа го зголеми притисокот врз САД, пренесува Reuters.