Австралискиот 28-годишен тенисер Ник Кирјос, кој се опоравува од разни повреди и операции, изјави дека повеќе не му се игра тенис и дека би сакал да ја заврши својата играчка кариера, но е убеден дека има „уште две добри години“.
Кирјос одигра само еден натпревар оваа 2023 година и загуби од Кинезот Ву Јибин на турнирот на трева во Штутгарт, Германија.
Финалистот на Вимблдон од 2022 година, кој минатата година се искачи на 11-то место на АТП-листата во сингл, ги пропушти сите Грен слем турнири во сезоната што штотуку заврши, а во саботата објави дека втора година во ред ќе го прескокне Австралија опен во Мелбурн, бидејќи стравува дека може повторно да се повреди.
„Искрено, да беше до мене, навистина немаше повеќе да играм. Но, морам. Имам уште толку многу да покажам, но повеќе не ми се игра“, изјави Ник Кирјос во подкастот „On Purpose“ што го води Џеј Шети.
Кирјос беше принуден да се повлече од овогодинешниот Австралија опен поради повреда на коленото, го пропушти Ролан Гарос поради повреда на стапалото, а ги пропушти Вимблдон и УС опен поради повреди на лигаментите на зглобот.
„Уморен сум. Имав три операции. Имам само 28 години и отсекогаш сум сакал да имам семејство и да живеам безболен живот. Денес, кога станувам, не можам да одам без болка“, изјави Кирјос, кој и претходно јавно зборуваше за своите психички проблеми преку социјалните мрежи и во популарната документарна серија посветена на неколку врвни тенисери „Break Point“, која може да се гледа на платформата Netflix.
И покрај моменталната физичка состојба, Кирјос сѐ уште не се откажал од играчката кариера.
„Сакам само да играм уште една или две години на врвно ниво и потоа да заминам како што сакам. Не сакам повторно да поминам низ каква било операција или нешто слично. Мислам дека сè уште можам да имам една или две добри сезони и тоа ќе биде тоа“, рече победникот во двојки на Австралија опен од 2021 година и додаде:
„Ќе бидам задоволен од моите достигнувања и ќе можам да им кажам на сите оние кои сакаат да продолжам да играм дека мора да прифатат дека ќе престанам да играм“.
