Интер не успеа со победа да ја почне новата сезона во Лигата на шампионите и слично како лани, почна со кикс на домашен терен.
Минатата сезона во најквалитетното клупско натпреварување Антонио Конте ја почна со бламажа дома. Играше против прашка Славија која дојде до 1:1 во Милано. Исто како и синоќа, Интер се спасуваше од порази, вчера со гол во 90-та, а лани со гол во судиското надполнување.
„Не верувам дека може да се споредува овој натпревар со она што се случи лани против Славија кога не успеавме да одиграме добро. Напротив, сега игравме добро против солидна екипа. Го предизвикавме противникот на фудбал, а не ми текнува Самир да имаше некоја интервенција. Создадовме многу шанси. Не можам да им го променам фудбалското размислување на играчите, но дефинитивно можеме да се подобриме и да научиме од грешките“, рече стратегот на „Нераѕурите“.
На само 4 часа до почетокот на синоќешниот натпревар Конте доби шокантна вест: латералниот бек Ашраф Хакими е позитивен на коронавирусот и не смее да игра.
„Не беше едноставно да се прими веста дека Хакими не смее да игра. Сѐ до утрината тренираше со нас и беше во план да игра. Веќе имавме подготвено тактика со него во тимот“, се жали Конте.
Проблем плус беше и тенката клупа. Конте имаше единаесетмина на клупата за резерви, но повеќето од нив беа резервисти и младинци. Роберто Гаљардини, Ашли Јанг и Милан Шкринијар се исто така позитивни на COVID-19.
„Нажалост немавме многу опции на клупата. Бастони имаше само два тренинга со тимот, додека Брозовиќ имаше проблем со мускулот. Потоа, Сенси се повреди, а Наинголан само еднаш тренираше. Згора на сѐ моравме Санчес да го замениме на полувреме поради проблем со адукторот. Ќе ја следиме неговата состојба“.
Неизбежно е прашањето за Кристијан Ериксен кој повторно доби шанса од првата минута, но беше заменет во 79-тата. Летоска беше во немилост кај Конте, ретко играше од почеток и покрај очекувањата на навивачите.
„Како и целиот тим и Ериксен одигра добро, покажа голема посветеност и труд. Побарав од него да биде порешителен со топката. Како и неговите соиграчи, она што го одигра беше позитивно“, рече Конте.
