Вечерва во Милано се игра првиот полуфинален натпревар во Копа Италија, а се среќаваат вечните и лути ривали Интер и Јувентус.
Две недели по Дерби д'Италија играно во рамките на Серија А во кое Интер победи со 2:0, денеска следува ново, исто такво дерби, но во купот.
Од 20:45 часот „Нераѕурите“ го пречекуваат Јувентус во првиот полуфинален натпревар. Антонио Конте очекува добра партија, но смета дека овие 90 минути нема да го дадат победникот.
„Против еден толку силен тим мора секогаш да се биде на високо ниво. Мора да одиграме одличен натпревар и да бидеме навистина продуктивни. Пласманот во финале се игра за 180 минути, но и првиов натпревар е важен. Минатата сезона против Наполи во полуфиналето загубивме 1:0 дома и потоа не успеавме да направиме пресврт без разлика што одигравме одлично на 'Сан Паоло'. Едноставно, мора да бидеме одлични и да се обидеме да дадеме сѐ од себе“, рече тој.
Голем хендикеп за Интер ќе биде отсуството на голгетерот Ромелу Лукаку кој поради кавгата со Златан Ибрахимовиќ во четвртфиналето заработи жолт картон кој му донесе автоматска суспензија. Неговото место ќе го пополни Чилеанецот Алексис Санчес.
„Не е прв пат да ни недостасува Ромелу, но тука ќе биде Алексис заедно со Лаутаро и убеден сум дека ќе одиграат добро. Ромелу е добар, тоа го покажа на терен, даде два гола со Беневенто, а сега ќе има можност да одмори против негова воља поради санкцијата“, вели Конте.
Можно е повторно шанса од почеток да добие и Кристијан Ериксен, кој како замена од клупата го реши победникот против Милан.
„Ериксен е одлично момче, напредува многу и се обидуваме да работиме многу со него и не само да најдеме едно решение, туку повеќе, за да има можност, како тој така и јас, а и тимот да има алтернатива на која ќе можеме да сметаме“.
Реваншот е точно за една недела.
