Кремљ денеска соопшти дека ги поддржува напорите на Србија да ги заштити етничките Срби во северно Косово, но ги отфрли обвинувањата на Приштина дека Русија поттикнува тензии за да сее хаос на Балканот.
Србите во етнички поделениот град Митровица во северно Косово подигнаа нови барикади во вторникот, неколку часа откако Србија соопшти дека ја ставила својата војска во највисока борбена готовност.
Косово, каде живее мнозинство албанско население, прогласи независност од Србија во 2008 година со поддршка од Западот, по војната во 1998-99 година во која НАТО интервенираше за да ги заштити етничките Албанци.
Косовскиот министер за внатрешни работи Џељаљ Свецла изјави дека Србија, под влијание на Русија, сака да го дестабилизира Косово, тврдење кое портпаролот на Кремљ, Дмитриј Песков, го отфрли.
„Србија е суверена држава и апсолутно е погрешно во тоа да се бара деструктивно влијание на Русија“, рече Песков. „Србија е суверена држава и природно е што ги штити правата на Србите кои живеат во близина во такви тешки услови и природно е што силно реагира кога овие права се прекршени“, додаде тој.
Србија негира дека се обидува да го дестабилизира својот сосед и тврди дека сака само да го заштити своето малцинство таму. Српскиот претседател Александар Вучиќ во вторникот изјави дека Србија „ќе ја продолжи борбата за мир и ќе бара компромисни решенија“.
На северот на Косово живеат околу 50.000 Срби кои одбиваат да ја признаат владата или државата Приштина, а Белград го сметаат за свој главен град.
Кремљ соопшти дека ги поддржува потезите на Србија.
„Имајќи многу блиски сојузнички односи, историски и духовни односи со Србија, Русија многу внимателно следи што се случува, како се почитуваат и обезбедуваат правата на Србите“, рече Песков. „И секако дека го поддржуваме Белград во акциите што се преземаат“, додаде тој.
