Напаѓачот ветеран не сака да се врати во Јувентус и јавно ѝ објави верност на Сампдорија.
Шпекулациите дека Фабио Куаљарела ќе го засили во Јувентус паднаа во вода откако самиот играч објави дека не сака да си оди од својата Сампдорија.
Италијанските медиуми велат дека Андреа Пирло е во потрага во напаѓач кој ќе ја збогати конкуренцијата за ротација во нападот, а на листата на желби се нашол и ветеранот од Сампдорија кој од 2010 до 2014 играше за Јуве и на 102 натпревара постигна 30 голови.
„Ако си дал многу и за возврат си добил уште повеќе, ако секој пат чувствуваш емоции кои ти чукаат в гради, тоа кажува дека постои врска поцврста од сѐ, која е многу поголема од ласкави додворувања, која на страна ги става шпекулациите и ја почитува историјата. Јас мислам, живеам и играм на овој начин. Форца Самп“, напиша Куаљарела на својот Instagram профил.
На свои 37 години тој е најдобар стрелец на Сампдорија сезонава со 7 голови на 14 натпревари, а ја игра шестата сезона во клубот од Џенова. Претходно настапуваше и за Торино, Асколи, Удинезе и Наполи.
Јувентус се поврзува и со Оливје Жиру од Челси и Грациано Пеле од кинескиот Шандон Лунен Таишан. Останува да видиме кој напаѓач ќе ја засили „Старата дама“ зимава.