Легендарниот велосипедист Ленс Армстронг од еден од најголемите спортисти во историјата стана најголемиот измамник во историјата на спортот, откако во 2013 година призна дека се допингувал.
Американецот од 1999 до 2005 година седум пати по ред победи на Тур де Франс, најтешката велосипедска трка во светот, а иако многумина се сомневаа дека го постигна успехот на легален начин, тој никогаш не падна на допинг-тест.
Меѓутоа, во 2013 година, за време на гостувањето кај Опра, тој призна дека се допингувал, а како резултат на тоа, подоцна му беа одземени сите титули, доби доживотна забрана за натпреварување и станал симбол на спортски измамник.
Десет години подоцна, сега 52-годишниот Армстронг одлучи јавно да проговори за тоа како со години успешно избегнувал да биде фатен во нелегалните активности.
Гостуваше во подкастот „Club Random“ на Бил Махер и отворено зборуваше за неговите срамни дела со цел да им помогне на сегашните и идните велосипедисти да се натпреваруваат на фер начин.
„Тестиран бев 500 пати и никогаш не паднав на допинг-контрола. Тоа не е лага. Тоа е вистината. Никогаш не сум избегал од допинг-контрола, немаше начин да го направам тоа. Секој пат кога одев на допинг-тест - секој пат поминував“, рече Армстронг и ја откри својата тајна.
„Некои од супстанциите што ги користев, особено оние кои беа најсилните подобрувачи на перформансите, остануваа во телото кратко време. Луѓето кои земаат анаболни стероиди го имаат истиот проблем како оние кои консумираат марихуана. На пример, можете да пушите џоинт , а за две недели ќе имате позитивен тест на марихуана, бидејќи таа подолго се задржува во организмот“, изјави Ленс и откри:
„Јас користев ЕПО, синтетичка верзија на хормонот еритропоетин, кој беше како ракетно гориво и беше тешко да се детектира бидејќи кратко се задржува во телото. Останува во телото само 4 часа по земањето, па затоа е лесно да се пресмета колку треба да се земе пред трката за да не се открие по трката. Тој го промени не само велосипедизмот, туку сите спортови каде што се бара сила и издржливост“, изјави Армстронг.
ЕПО, заедно со многу други супстанци, беше забранета после таа 2013 година, но сè уште има шанси велосипедистите да се натпреваруваат допингувани, а Армстронг се надева дека овој начин барем ќе помогне да се спречи тоа.
