Сагата околу продолжувањето на договорот на Лионел Меси со Пари Сен-Жермен трае откако се врати од Мундијалот во Катар, а угледниот француски дневен весник тврди дека сега се знае и причината за тоа: Меси ќе остане само ако сезонава ПСЖ ја освои Лигата на шампиони.
Првиот тест на патот кон оваа титула е минхенски Баерн кој успеа да слави со 1:0 на првиот осминафинален натпревар во Париз и сега важи за фаворит за пласман во четвртфиналето воочи реваншот на 8 март во Баварија. Доколку тоа се случи, тогаш ПСЖ на Денот на жената ќе знае дека на лето ќе остане без Аргентинецот, кој според последните информации од Каталонија би можел да се смири со Лапорта и да се врати во Барселона за таму да ја заврши кариерата.
Меси во Париз дојде во 2021 година токму од Барса откако каталонскиот клуб се најде во финансиски проблеми. Капитенот на светскиот шампион Аргентина има договор со „Светците“ до 30 јуни годинава.
„Меси не е баш најсреќен во Париз бидејќи очекуваше да има подобри резултати со ПСЖ. Се разбира, главната цел е да ја освои Лигата на шампионите. Преговорите беа во завршна фаза, но Меси се предомисли. Аргентинскиот фудбалер веќе реши да го напушти ПСЖ на крајот на сезоната, но не сака со својата одлука да ја наруши и онака лошата атмосфера во соблекувалната. Постои шанса Меси да остане во Париз доколку ПСЖ ја освои Лигата на шампионите. Меѓутоа, поблиску е да го напушти Париз отколку да остане“, пишува L'Équipe.
Некои медиуми претходно објавија дека постои можност Меси да ја продолжи кариерата во американската МЛС, Саудиска Арабија или пак да се врати во Барселона.
„Семејството на Меси не се адаптираше многу добро во Париз. Тоа е уште една причина зошто Аргентинецот сака да го напушти Париз. Неговото семејство сака Лео да се врати во Барселона, но тоа не е лесно. Меси му е лут на претседателот на Барселона, Жоан Лапорта, поради начинот на кој мораше да го напушти каталонскиот клуб иако веќе сѐ беше договорено за потпишување на нов договор“, заклучува францускиот весник.