Луѓето користеле халуциногени дроги во Шпанија пред околу 3.000 години, според новата студија објавена во списанието Scientific Reports.
Научниците велат дека влакната од гробница во Менорка покажуваат дека човечките цивилизации од бронзеното доба користеле лекови добиени од растенија и грмушки, пишува BBC. Се верува дека тоа е најстариот директен доказ дека луѓето во Европа земале халуциногени дроги.
Научниците велат дека по консумирањето на овие дроги, луѓето биле во делириум и имале халуцинации. Истражувањата покажаа знаци на човечка активност во пештерата Ес Кариткс, на југозападната страна на Менорка.
Во пештерата има повеќе од 200 човечки гробови, а се верува дека околу 600 години, до 800 година п.н.е., служела како ритуално и гробно место.
Истражувачите веруваат дека супстанциите, кои можеле да бидат доста силни, биле користени како дел од ритуалите што се одржувале во пештерата.
„Тие можеби вклучувале шамани кои можеле да ги контролираат несаканите ефекти на хербалните дроги“, велат истражувачите.
Анализата на прамени коса, кои биле обоени во црвено за време на древните ритуали и можеле да потекнуваат од повеќе од една личност, открила три психоактивни супстанци. Заедно со атропинот и скополаминот, кои предизвикуваат халуцинации, научниците пронајдоа ефедрин, кој ја зголемува енергијата и будноста.
Во пештерата се пронајдени садови со спирални мотиви врежани на капаците. Некои научници, се наведува во извештајот, сметаат дека тоа покажува дека дошло до промена на состојбата на свеста на личноста додека била под дејство на дрога.
Претходните докази за употреба на дрога за време на праисторијата во Европа беа индиректни, како што е појавата на дрога во уметничките прикази, пишува BBC.
