Интер по продолженија ја совлада Фиорентина на гости и ја продолжи потерата по пехарот во Копа Италија.
Ако на Милан синоќа му беа потребни пенали, денеска Интер беше блиску до исто сценарио. Со гол во 119. минута сепак избегна таков рулет.
Интер го отвори резултатот пет минути пред паузата кога поради игра со рака главниот судија досуди удар од белата точка, а сигурен реализатор беше Артуро Видал за кого ова е прв гол во црно-синиот дрес.
Фиорентина израмни во 57. минута со силен удар на Кристијан Куаме.
Бидејќи до крајот никој не успеа да постигне победнички гол, натпреварот замина во продолженија од двапати по 15 минути.
А, таму, на минута пред истекот на времето, нововлезениот Ромелу Лукаку со глава заби за победа на Интер по центаршутот на Николо Барела.
Во четвртфиналето ќе има миланско дерби бидејќи ќе се сретнат Интер и Милан.
