Белгискиот напаѓач Ромелу Лукаку постигна 10 погодоци во првите 9 настапи за Манчестер Јунајтед што е најдобар старт на некој играч во историјата на „Црвените Ѓаволи“.
Лукаку во шест настапи во првенството постигна шест голови, во два настапи во Лигата на шампионите постигна 3 погодоци, а беше стрелец и во финалето на Суперкупот против Реал Мадрид.
Досега најдобар старт имаше легендарниот Боби Чарлтон, кој во 1956 година во првите девет настапи за овој клуб постигна 9 погодоци, додека Холанѓанецот Робин Ван Перси во 2012 постигна седум погодоци во девет настапи.
„Лукаку е скромен и има огромна желба да учи. Сака да напредува и неговата амбиција е огромна. Неговите бројки оваа сезона се импресивни“, истакна менаџерот на Манчестер Јунајтед, Жозе Мурињо.
На претходникот на Лукаку, Златан Ибрахимовиќ, му беа потребни 20 натпревари за да дојде до бројката од 10 постигнати погодоци, додека пак на Ентони Марсијал дури 31 натпревари за да дојде до оваа бројка на голови.
Најдобриот стрелец во историјата на Манчестер Јунајтед Вејн Руни успеа да постигне 6 погодоци во првите 10 настапи.
Лукаку ова лето пристигна на „Театарот на соништата“ од редовите на Евертон за 75 милиони евра.