Пред некое време ми посочија дека мај е всушност месец на мастурбацијата (а не е ли секој месец?!), па почнав да мислам како би можела да помогнам кон оваа цел на општото добро во име на месецов.
И да, мај е веќе половина и поминат, но тоа не значи дека останатите денови од него не можеме да ги исполниме со интересни активности кои би ни донеле задоволство. Сакам само да кажам јасно дека би зборувала за женската мастурбација, бидејќи таму имам доста искуство (никогаш доволно). Веќе имам зборувано за добрите страни на мастурбацијата (ТУКА и ТУКА) и тоа дека таа како чин не е ништо срамно или страшно и дека треба да ја прифатиме во сета нејзина убавина, па затоа денес сакам да зборувам за неколку совети и техники кои можеби не ви текнале до сега.
Постојат различни типови на мастурбација кај жени, во однос на тоа кој дел од телото се стимулира- клиторална, вагинална, анална или комбинирана маструбација - и сите тие водат кон различен тип на оргазам. Иако не е албум со сликички, јас би ви препорачала (внимателно) да се обидете да ги соберете сите. За таа цел најчесто се користат прстите на едната (или двете) раце и/или некоја секс-играчка (доколку користите раце длабоко ви препорачувам да немате долги и остри нокти, за да не се повредите).
Направете си атмосфера за опуштање. Сите ја цениме ефикасноста на „едно набрзинка“, но, сега го славиме месецот на соло играта, па затоа ајде да посветиме малку повеќе време на себе. Пуштете си ја омилената музика, спуштете ги ролетните, запалете свеќи - која и атмосфера да ве асоцира на добар секс, направете си ја. Од нас, за нас. Бидејќи ако сами не знаеме да си ја погодиме, не може да очекуваме партнерите да знаат.
Земете си лубрикант. Некогаш полесно ни оди мислата да се „запалиме“, па може да нема потреба од него, но некогаш не е на одмет да се има. Лубрикант е задолжителен доколку се решите за анална игра.
Дајте си време и оставете го паметот да ви проталка. Мислете на што и да е што ви го разгорува тоа расположение. Најдобриот секс што сте го имале до сега? Најдобриот секс што сакате да го имате? Некоја личност која неверојатно ве привлекува? Што и да е, оставете си време убаво да си влезете во таа фантазија и не се брзајте.
Разгорете ги другите ерогени зони. Да, веројатно оргазамот ќе ви дојде од стимулирање на „јужното подрачје“, но нема ништо лошо во тоа да си ги разгледате и разгорите и другите ерогени зони - градите, половината, вратот, бутините. Соло играта не мора да значи дека мора да се скокне предиграта. Едноставно направете си ја сами. Посветете им малку внимание и на другите ерогени зони и телото ќе ви врати дупло.
Сменете ја редовната поза. Сите имаме најчеста поза за соло игра, но размислете дали би можеле да ја смените? Доколку редовната поза ви е да сте на грб, пробајте да седнете онака како што би седнале над партнерот, за да ги смените малку нештата. Пробајте можеби да седнете врз перница или да легнете на страна. Верувам дека имате и некоја друга поза која би ви ја разгорила имагинацијата.
И доколку ви треба уште стимул, размислете за порнографија или еротика. Нема ништо страшно во уживање и во порнографски или еротски содржини. Сигурно можете да најдете нешто кое ќе биде по ваш вкус без разлика дали е тоа нешто визуелно или можеби напишано. Може да се работи кои никогаш не би ги направиле во „вистинскиот живот“, а да ви ја стимулираат фантазијата доволно кога сте сами.
На крајот на денот, сите овие „совети“ се за постигнување на вашето задоволство. Така што модифицирајте ги слободно по тоа како на вас ви годи. Да не го оставиме месецот на маструбацијата неискористен, девојки! А и ништо лошо да ги практикуваме овие работи и во другите месеци од годината.
*Името на авторката на текстот ѝ е познато на Редакцијата на Kajgana.com