Рускиот тенисер Даниил Медведев изјави дека сака да игра на тврди подлоги и додаде дека очекува добри резултати во остатокот од сезоната на турнирите на земја, пренесуваат американските медиуми.
Медведев синоќа го освои Мастерсот во Мајами, откако со 7:5, 6:3 го совлада Италијанецот Јаник Синер. Со триумфот на Флорида стигна до 18-тата титула на турнири на тврда подлога, а вкупно 19-та во кариерата.
„Кога би се запрашал, би се играло само на тврда подлога. Но, целосно разбирам дека тоа не би било фер. Навистина сакам да играм на тврда подлога“, изјави Медведев, пренесува официјалната веб-страница на АТП и додава:
„Тврдата подлога е местото каде што најдобро ја чувствувам играта. Иако знам дека можам да играм прилично добро и на трева и на земјена подлога, ова е местото каде што мојата игра е најфлуидна. На тврди терени можеби не го играм мојот најдобар тенис, но можам да победувам натпревари. Тоа е голема разлика“.
Рускиот тенисер со триумфот во Мајами стигна до четвртиот трофеј сезонава, по триумфите во Ротердам, Дубаи и Доха.
„Мислам дека никогаш не сум имал толку добар почеток на една сезона. Обично сум најдобар на Австралија Опен, каде двапати стигнав до финалето. Годинава не бев доволно добар во Мелбурн, па затоа сум среќен што успеав да ги свртам работите“.
Медведев пред две години изјави дека не сака да игра на земјена подлога. Никогаш нема освоено турнир на земја, а во финале играше само еднаш и тоа во 2019 година во Барселона.
„Знам дека можам да играм добро и на земјена подлога. Ги победив Новак Ѓоковиќ и Стефанос Циципас во Монте Карло во 2019 година, а тоа за мене е одличен резултат на земјена подлога. Ако не го играм мојот најдобар тенис, можам многу полесно да изгубам“, заклучи Медведев.