Авионот со репрезентацијата на Аргентина рано утринава слета во Буенос Аирес, а во земјата е прогласен државен празник во знак на добредојде на капитенот Лео Меси и соиграчите, по освојувањето на СП во Катар.
Меѓу новинарите кои чекаа на пистата, многумина почнаа гласно да пеат. Додека Меси излегуваше од авионот и одеше на црвен тепих со трофејот в раце, надвор свиреше бенд за добредојде.
Се очекува стотици илјади навивачи подоцна да излезат на улиците на главниот град во текот на победничката парада откако Аргентинците ја совладаа Франција во финалето во Катар.
Екипата ќе преноќи во тренинг центарот во Фудбалскиот сојуз на Аргентина. Илјадници навивачи вчера кампуваа пред тренинг центарот и на социјалните мрежи веќе се објавени снимки од големиот број обожаватели кои го чекаа враќањето на шампионите.
Денес во Буенос Аирес се слави светската титула во фудбал, прв пат по 1986 година.