Microsoft потврди инвестиција од најмалку 10 милијарди долари во алатката за вештачка интелигенција позната како ChatGPT, по неколку недели гласини за овој колосален финансиски договор.
Иако Microsoft не ја потврди точната бројка, во понеделникот во соопштение за медиумите најавија дека партнерството меѓу двете компании ќе биде продолжено.
Оваа неодамнешна инвестиција е третата фаза од финансиската посветеност на Microsoft кон оваа компанија. Извршниот директор на Microsoft, Сатја Надела, рече дека пристапот до вештачката интелигенција значително ќе се подобри.
„Во следната фаза од нашето партнерство, програмерите и организациите низ индустриите ќе имаат пристап до најдобрата платформа за вештачка интелигенција, модели и синџир на алатки за да ги изградат и стартуваат нивните апликации“, рече Надела.
ChatGPT е чет-бот објавен кон крајот на минатата година од OpenAI, компанија првично основана од Илон Маск и Сем Алтман. Оваа револуционерна алатка пријави еден милион корисници на почетокот на декември откако беше онлајн околу една недела.
Microsoft ќе продолжи да биде ексклузивен провајдер за OpenAI и ќе води нова истражувачка работа на API услугите. Вреди да се спомене дека Microsoft веќе инвестираше во OpenAI во претходните фази. Имаше почетна инвестиција од 1 милијарда долари во стартапот со седиште во Сан Франциско уште во 2019 година. Оттогаш, Microsoft тивко инвестирал уште 2 милијарди долари во компанијата, според извори од индустријата.