Македонската фудбалска репрезентација до 21 година денеска од 18:45 часот на Националната Арена „Тоше Проески“ во Скопје игра квалификациски натпревар со Шпанија, репрезентација која во оваа категорија важи за најдобра на Стариот континент и воедно е актуелен шампион.
„Момците покажаа дека имаат квалитет да ѝ се спротистават на најдобрата репрезентација во Европа. Тоа ми дава за право да бидам оптимист. Секако дека има и што да поправиме, па на овој натпревар да бидеме во текот на целите 90 минути онака како што планираме“, вели селекторот Благоја Милевски.
Поради одложувањето на мартовските и јунските натпревари поради пандемијата со коронавирусот, УЕФА направи мали промени и во начинот на квалификување. Го укина баражот за второпласираните репрезентации, па сега најдобрите 4 второпласирани директно ќе се пласираат. Тоа значи дека Македонија мора да собира што е можно повеќе бодови бидејќи на крајот второто место може да биде и пиров успех.
„По промената на системот за пласман на ЕУРО и она кој и како ќе се квалификува, не ни останува ништо друго освен да одиме на победа на секој натпревар и да собираме што е можно повеќе бодови.
Натпреварот се игра без публика, а директен пренос ќе има на МРТ1 и МРТ3.
Синќа Фарски Острови ни направија услуга со тоа што го изненадија и победија Израел со 3:1, репрезентација која ни е главен ривал за 2. место. Денеска од нашата група се игра и дуелот Казахстан - Црна Гора.