Селекторот на македонската фудбалска репрезентација денеска на пладне одржа прес-конференција на која даде свое видување во однос на предизвикот кој ни претстои, баражот против фудбалскиот великан Италија.
Милевски приликата ја искористи и да го објави списокот на повикани фудбалери.
„Се работи за еден натпревар со Италија на кој сѐ е отворено. Нашите фудбалери треба да уживаат во овој бараж, да покажат дека не сме случајно на ова место и меѓу најдобрите 20 селекции во Европа. Ме радува формата во која се наоѓаат нашите репрезентативци. Што се однесува до Италија, се работи за селекција која е во топ пет по квалитет, актуелен европски првак. Меѓутоа, секоја селекција има свои силни и слаби страни, така е и со нашиот следен противник, наше е да успееме тоа да го искористиме“, рече тој.
„Овој тим на Македонија не знае да игра дефанзивно и да игра пасивно. Тоа го покажавме на сите седум натпревари во квалификациите, а ќе се потрудиме да го потврдиме и на дуелот со Италија. Ќе биде тешко, но не и невозможно. Нема лесен натпревар на ова ниво“.
Македонија досега двапати има играно против Италија и тоа во квалификациите за претходниот Мундијал. Во Скопје загубивме 2:3 со гол примен во судиското надополнување, а потоа во Торино одигравме 1:1.
„Искрено, не гледам поврзаност со претходните два меѓусебни натпревари против Италија. Од последниот натпревар со Италија мина долго време, двете селекции имаат различен селектор, различна филозофија. Сега играме еден натпревар, кој е од сосема поинаков тип и важност, во споредба со двата квалификациски натпревари одиграни во Скопје и Торино“, заврши селекторот.
Македонија ѝ гостува на Италија на 24 март на „Ренцо Барбера“ стадионот во Палермо со почеток од 20:45 часот. Се игра 90 минути со продолженија од двапати по 15 минути во случај на нерешен резултат, а доколку повторни нема победник ќе се шутираат пенали. Победникот потоа на 29-ти ќе игра финален бараж против победникот од дуелот Португалија - Турција, на теренот на победникот од тој дуел.
