Селекторот на македонската фудбалска репрезентација зборуваше за проблемите во националниот тим, поточно за сѐ почестите отсуства на капитенот Ристовски и моторот во средниот ред Адеми.
Изминатава календарска 2022 година Македонија одигра точно 11 натпревари. Капитенот Стефан Ристовски учетсвуваше на само 4: двата баража во март против Италија и Португалија, како и последните два натпревара - ноемвриските пријателски со Финска и Азербејџан. Ги пропушти буквално сите шест натпревари во Лигата на нации, а на пријателската со Саудиска Арабија не беше повикан бидејќи Македонија играше со состав од домашната лига.
Неговиот соиграч од загрепски Динамо, Аријан Адеми, одигра уште помалку: по двата мартовски баражи воопшто не го видовме во дресот со сонцето. Нивното отсуство и тоа како се почувтсвуива во игрите вои Лигата на нации, што резултираше со незадоволителни резултати и пласман само на 3. место, зад Грузија и Бугарија, а единствено пред аутсајдерот Гибралтар.
Нивните отсуства создадоа низа чаршиски муабети. Иако клубот секогаш потенцираше дека не се со репрезентацијата поради повреди, чаршијата започна шпекулации дека станува збор за некаков бојкот кон селекторот.
Во своето новогодипшно интервју за веб-страницата на ФФМ, меѓу другото, селекторот Благоја Милевски проговори и за отсуството на овие двајца играчи, кои важат за едни од клучните во репрезентацијата.
„Да бидам искрен, имам доволно искуство за да не размислувам за такво внимание од луѓето кои се обидуваат да 'плетат' такви приказни. Најважно за мене е тоа што го добивам како информација во разговорите со фудбалерите, па и со Стефан и Аријан. Никогаш и ништо за мене не било поважно од тоа. Така и функционираме“.
„Јас сум професионалец, искрен во намерите и секогаш настојувам да бидам отворен и транспарентен. Тоа го барам од сите, се разбира и од фудбалерите. Би било добро за Македонија да ги имаме во тимот за квалификациите. Се надевам дека како и сите други ќе бидат здрави и подготвени да се стават на располагање“, рече Милевски.