Научниците на НАСА кои работат на мисијата Касини во април снимија необична појава на прстените на Сатурн. Планетата која е препознатлива по своите различни и шарени прстени, според НАСА важи за фреска што ја насликала природата.
Прстените се состојат од милијарди честички прашина, каменчиња и лед кои околу големата гасовита планета патуваат со брзини кои достигнуваат илјадници километри на час. Нивната дебелина не е голема и се движи меѓу девет и 90 метри, но обемот е огромен и е околу 282.000 километри.
Нарушувањето што неодамна го забележа Касини е на крајниот надворешен прстен Ф кој е воедно и најактивниот. Неговиот изглед се менува постојано, а научниците сметаат дека овој пат нарушувањето го предизвикало некое тело кое се движело во прстенот, но не можеле да се забележи поради сета прашина во прстенот.
Главниот виновник за турбуленциите во прстените вообичаено е месечината на Сатурн, Прометеј, чие движење не е секогаш совршено кружно.
Неговото движење во близина на прстенот Ф предизвикува промени во гравитациските сили, а кога ќе станат нестабилни, прстените знаат да исфрлаат материјал во вселената. Научниците сметаат дека токму тоа се случило овој пат.