Судот во Хамбург осуди 95-годишна жена на затворска казна од речиси една и пол година поради упорно негирање на холокаустот.
Обвинението против Урсула Хавербек, позната како „наци баба“, е резултат на нејзините изјави во 2015 година за време на судењето на поранешниот нацистички член Оскар Гронинг, кој служел како чувар во Аушвиц.
Тогаш Хавербек им тврдеше на новинарите дека Аушвиц, во кој, според проценките на историчарите, нацистите систематски убиле најмалку 1,1 милион луѓе, главно Евреи, бил работен логор, а не логор за истребување.
Судот во Хамбург ја осуди на една година и четири месеци затвор, од кои четири месеци ќе се сметаат за издржани поради долгото одложување на судската постапка.
Исто така, пресудата не е правосилна бидејќи постои можност за жалба. Во 2015 година, Хавербек првично беше осудена на 10 месеци затвор без можност за условна казна во окружниот суд. Таа поднела жалба на таа пресуда, но судењето започнало дури девет години подоцна.
Со години судовите се занимаваат со нејзините изјави во кои таа го негира холокаустот, најголемото страдање на Евреите во историјата. Екстремистката за нејзините изјави за прв пат беше казнета во 2004 година, со парична казна.
Таа веќе помина повеќе од две години во затвор поради негирање на холокаустот. Судот во Берлин потоа ја осуди на една година затворска казна во 2022 година за поттикнување омраза. Хавербек сè уште ја нема отслужено таа казна.
