Дури 32 степена Целзиусови биле измерени во понеделникот во селото Ојмјакон во далечниот исток на Русија, што е крајно невообичаено за ова најстудено село во светот.
Нов температурен рекорд е измерен во селото Ојмјакон во руската република Саха. Селото меѓународно е познато како најстуденото трајно населено место во светот. Во регионот се појавија и шумски пожари како резултат на топлиот бран.
Температурите во селото во понеделникот достигнаа 32 степена Целзиусови, пренесоа локалните медиуми. Тоа значи дека претходниот топлотен рекорд од 30,5°C поставен во 1949 година, е надминат.
Лидерот на републиката Саха, Ајсен Николајев, во понеделникот прогласи вонредна состојба во регионот поради огромните шумски пожари што се раширија изминатиов викенд. На неговиот канал на Telegram објави дека регионот на Ојмјакон е меѓу најпогодените од топлотниот бран.
Селото Ојмјакон е меѓу најстудените места во северната хемисфера, со температури што се имаат спуштено и до -67,7 степени Целзиусови, забележано во 1933 година. Но, непотврден рекорд од -71,2°C бил пријавен седум години претходно.
И покрај екстремните зимски услови, Ојмјакон има перманентно население од околу 500 жители.
Климатските промени претставуваат особена опасност по Саха, со оглед на тоа што голем дел од инфраструктурата е изградена над пермафрост (вечен мраз). Експертите предупредуваат дека одмрзнувањето може да доведе до големи социјални и економски последици во регионот.
Републиката Саха е дом на етничкиот народ Јакути, и е најголема од сите републики во Руската Федерација.