Австрискиот фудбалер Дејвид Алаба претрпе ужасни расистички навреди на социјалните мрежи откако одбра да гласа за Лео Меси пред соиграчот од Реал Мадрид, Карим Бензема, на синоќешното доделување на наградите The Best на ФИФА.
Меси синоќа беше прогласен за најдобар играч во светот за 2022 година, а во меѓувреме се појавија податоци за гласањето на сите капитени и селектори на репрезентациите.
Гласањето на Алаба предизвика најмногу реакции бидејќи австрискиот капитен го избра Меси наместо неговиот клупски колега Бензема.
Имено, Алаба ги даде своите максимални 5 бода на Меси, 3 му даде на Бензема, а 1 на Килјан Мбапе.
Поради оваа одлука, на социјалните мрежи стана популарен хаштагот #AlabaOut, кој го објавуваат незадоволните навивачи на Реал. Со него бараат тој да си замине од Мадрид бидејќи станал предавник.
Дефанзивецот доживеа и одвратни навреди на своите профили на Twitter и Instagram, а многу од нив имаа примеси на расизам.
Алаба утрово одлучи да се огласи за гласањето.
„Во врска со наградата The Best на ФИФА: Австриската репрезентација гласаше за оваа награда како тим, а не јас сам. Сите во тимскиот совет може да гласаат и така беше одлучено. Сите знаат, особено Карим, колку му се восхитувам на него и неговите игри и често сум велел дека за мене тој е најдобриот напаѓач во светот, а тоа е сè уште така. Без сомнеж“, напиша тој.
Како и да е, гласот на Алаба сигурно немаше да го смени конечниот победник бидејќи Меси беше убедлив победник со 52 бода.