Нов пораз за „Црвените ѓаволи“ кои попладнево загубија на гостувањето во Лондон кај тимот на Арсенал.
Дека се наѕира нов пех за тимот на Ралф Рангник се потврди уште по само три минути игра кога Нуну Тавареш го отвори резултатот носејќи водство на домашните.
Во 28. минута Еди Нкетиа постигна гол кој ВАР оправдано го поништи поради офсајд, но дури 4-минутниот преглед на крајот покажа дека иако голот не важи, има пенал за домашните поради фаул направен од МекТоминеј во акцијата која му претходеше на офсајдот. Бакари Сака прецизно го изведе ударот од белата точка за дуплирање на водството.
Само две минути подоцна искра надеж се врати кај гостите откако Немања Матиќ го пронајде Кристијано Роналдо во гостинскиот шестнаесетник, а португалскиот ветеран протнувајќи се меѓу двајца постави нога и намали на 2:1.
По паузата гостите од Манчестер промашија колосална шанса за израмнување. Имено, во 57. минута Бруну Фернандеш од пенал ја погоди стативата, иако го испрати Арон Рамсдејл на спротивната страна. Четити минути подоцна Роналдо израмни, но и неговиот гол беше поништен поради офсајд.
На точно 20 минути пред крајот Гранит Џака со одличен удар ги постави конечните 3:1 и нови важни 3 бода за Арсенал.
Арсенал грчевито се бори за 4. место и влез во Лигата на шампионите заедно со Челси, Тотенхем и Манчестер Јунајтед, кој полека но сигурно отпаѓа од игра. „Ѓаволите“ запишаа 3 порази во последните четири кола и имаат 54 бода, додека „Топчиите“ имаат 60 и натпревар помалку. Челси со 62 и Тотенхем со 57 бода допрва ги играат своите натпревари од тековното коло.
