Се чини дека Нејмар раскрсти со ПСЖ.
По дебаклот во Лигата на шампионите, навивачите најмногу му се настрвија на Бразилецот, кого го обвинуваат за бројните повреди и проблеми надвор од теренот. ПСЖ пред пет години ѝ плати 222 милиони евра на Барселона за Нејмар, но тој никогаш не се наметна како лидер и играч кој прави разлика во важните натпревари од Лигата на шампионите.
Бразилецот ги изнервира навивачите со изјавата дека би сакал наскоро да се испроба во МЛС и дека поради големиот притисок ја губи волјата за фудбал. Моментално однесувањето на Нејмар придонесува за ужасната атмосфера внатре во клубот и само се чека крајот на сезоната за да се спакува и да замине од соблекувалната.
Даниел Риоло, новинар на RMC, тврди дека Нејмар е во лоша состојба.
„Речиси не тренира, на тренинзи доаѓа мизерен, на работ на пијанство. Така е, Нејмар е во духот на одмаздата против ПСЖ. Тотално раскина со клубот и соблекувалната“, изјави Риоло.
„Нејмар го уништи ПСЖ“
Речиси и да нема шанси бразилскиот напаѓач да остане во ПСЖ.
„На навивачите на ПСЖ не им е гајле за лудостите на Нејмар и неговиот документарец на Netflix. Мора да му напишеме чек и да го пуштиме да си оди. Тој му прави голема штета на клубот. Пуштете го, го уништува ПСЖ“, продолжува Риоло.
Нејмар оваа сезона има 21 настап за ПСЖ. Постигна пет гола и пет пати асистираше, а одигра вкупно 1.545 минути. Од 2017 година одигра 135 натпревари за ПСЖ и постигна 91 гол во сите натпреварувања. Претходно беше споменато дека Нејмар треба да престане да игра за Бразил по Светското првенство во Катар и да замине во МЛС или да ја заврши професионалната кариера порано од предвиденото.
