Подводниот вулкан познат како Home Reef на островите Тонга се разбуди по 16 години длабок сон и на 10 септември 2022 година лава и парчиња карпи почнаа да „истекуваат“ во океанот на 25 километри југозападно од островот Лата.
Отпадоците почнаа да се собираат на едно место, а за само неколку дена се создаде сосема нов остров со големина од 4.000 метри квадратни и висина од 10 метри. На 20 септември, претставници на геолошкиот институт на Тонга (TGS) објавија дека островот пораснал шестпати, проширувајќи се на 24.000 квадратни метри. Експертите се сомневаат дека ќе продолжи да расте.
Како феникс што се издигнува од пепелта, овој остров веројатно ќе потоне назад во Огнениот прстен на Тихиот Океан долго пред некој морнар да се понадева дека ќе стапне на неговиот карпест брег.
Пацифичкиот огнен прстен, познат и како Тихоокеански огнен прстен, е низа на вулкани кои го опкружуваат Тихиот Океан. Таму се наоѓаат 40% од сите активни вулкани, кои, покрај тоа, како стратовулкани или сиви вулкани имаат огромна експлозивна моќ.
Кога Home Reef последен пат „роди“ нов остров во 2006 година, беше потребна една година за океанските бранови да ја еродираат неговата издигната површина. А овој пат се работи за уште понизок новоформиран остров, пишува Science Alert.
Од 1852 година наваму, плодниот Home Reef „родил“ острови во пет наврати, од кои некои достигнале висина помеѓу 50 и 70 метри. Во 1984 година, една дури имаше своја мала лагуна. Морската планина одговорна за овие краткотрајни структури се наоѓа во регионот на Тихиот Океан познат како зона на субдукција Тонга-Кермадек, која е домаќин на некои од најбрзо конвергираните тектонски плочи во светот.
Во таа област, Пацифичката плоча брзо се лизга под две други плочи (Кермадек и Тонга) со брзина од околу 24 сантиметри годишно, формирајќи го вториот најдлабок ров во светот и исклучително активен вулкански лак. Овој дел од гребенот на морското дно, кој се протега од Тонга до Нов Зеланд, има најголема густина на подводни вулкани во светот.
Сателитските снимки од неодамнешната ерупција на Home Reef го покажуваат формирањето на најновиот остров. Сликата беше објавена од НАСА користејќи податоци од Геолошкиот институт на САД (USGS) на 14 септември. На него се гледа долга трага од чад, но и забележлива промена на бојата на околниот океан.
НАСА вели дека океанот најверојатно станал заматен поради прегреаната кисела морска вода што се меша со делови од вулкански карпи и остатоци.
