Директорката на Клиника за инфективни болести и фебрилни состојби, д-р Милена Стевановиќ денеска одговара на прашања на прес-конференција заедно со министерот за здравство Венко Филипче.
На новинарско прашање во врска со големата смртност кај пациентите со COVID-19 во овој бран од епидемијата, поточно дали сега пациентите се носат во потешка здравствена состојба од порано, д-р Милена Стевановиќ одговори:
„За прецизно дискутирање околу смртните случаи навистина треба да се направат прецизни, сериозни анализи и проверки што и како е заведено и пријавено. Јас би одговорила од аспект на Клиниката за инфективни болести, она што ние го гледаме таму и смртните случаи кај нас. Ние од вкупниот број на преку 470 пациенти хоспитализирани и лекувани на Клиниката, имаме 90 пациенти кои се, за жа, со смртен исход. Најголем дел од пациентите е донесен на лекување после десетина, па и 15 дена самолекување дома, без никаква консултација на лекар. Поголем е бројот на пациенти кои се лекувале сами дома помалку од 10 дена, повторно без никаква консултација на лекар. Нашите математики се од прилика дека околу 50% од пациентите кои се лекувани кај нас и за жал завршиле со најнепосакуваниот исход, се предоцна донесени на лекување. Верувам дека исходот би бил поинаков доколку пациентите барем се консултирале со својот матичен лекар, тој би ја следел состојбата и евентуалните влошувања би биле навреме третирани. Тоа е еден дел од причината за бројката на починати пациенти. Дали е таа голема или не, навистина треба да се направи сериозна анализа од кадешто ќе се извлечат проценти кои ќе може да бидат споредувани со регионот или со остатокот од светот.
