Од Министерството за здравство соопштија дека по барање на министерот за здравство, Беким Сали денес се поднесени оставки од двајца директори на универзитетски клиники.
Станува збор за директорката на Универзитетска клиника за детски болести, проф. д-р Аспазија Софијанова и директорот на Универзитетска клиника за радиотерапија и онкологија, д-р Никола Васев.
Согласно законските процедури, по назначување нови директори на овие клиники од страна на министерот, јавноста навремено ќе биде информирана, додаваат оттаму.
Министерот Сали минатата недела изјави дека ќе бидат преземени соодветни мерки, односно ќе ги разрешат или казнат директорите доколку под нивно влијание се формирале платите во клиниките, пренесе 360 Степени. Увидот во клиниките од страна на Фондот следуваше откако ТВ Клан објави сторија за дежурствата и висината на платата на директорката, со податоци дека Софијанова земала над 3 000 евра месечно.
Ваквите информации Софијанова ги демантираше.