Селекторот на шведската фудбалска репрезентација Јане Андерсон ќе ја напушти клупата на оваа скандинавска репрезентација доколку не успеат да се пласираат на ЕУРО 2024 во Германија, потврдија од тамошната федерација.
Овој 61-годишен стручњак е на клупата на Шведска од 2016 година. Тој е во незавидна ситуација со оглед на лошиот старт на квалификациите за горенаведеното натпреварување, бидејќи по пет одиграни натпревари собра само 6 бода и моментално е на третото место во групата Ф.
Во септември доживеаја убедлив домашен пораз од Австрија, беше 3:1, по што медиумите во оваа земја почнаа да го критикуваат искусниот стратег.
„Единственото нешто за што размислувам е пласман на ЕУРО, но по поразот од Австрија мојата иднина на клупата на репрезентацијата е под знак прашалник и затоа сега сакаме да разјасниме сè“, изјави Андерсон и додаде:
„Сè уште мислам дека ќе се пласираме на ЕУРО, ќе направиме сè за да ја постигнеме таа цел. Имаме три натпревари до крајот на есента и се надевам дека ќе се радуваме на крај“.
Претседателот на Федерацијата, Фредрик Рајнфелд, потврди дека доколку Швеѓаните не се пласираат на ЕУРО, Андерсон ќе ја напушти клупата.
„Добро е што го разјаснивме тоа, сега на сите им е јасно дека доколку не се пласираме на ЕУРО, ќе го смениме тренерот“, изјави Рајнфелд.
Швеѓаните на 16 октомври ќе играат на гости кај Белгија, по што следниот месец ќе имаат натпревари против Азербејџан и Естонија.
