Поранешниот фудбалер на Тотенхем, Џермејн Џинас, откри какви навики во исхраната имал Гарет Бејл пред натпреварите, а она што го кажа апсолутно ги изненади сите.
Џинас изјави дека обично јадел чинија житарици пред натпреварите, додека Бејл имал сосема поинаков начин на подготовка.
„Тоа е единствениот начин на јадење што се сеќавам дека го видов и бев вчудоневиден. Бејл пред секој натпревар имаше пет парчиња тост и брзо потпечен грав“, откри Џинас.
Призна и дека еднаш се обидел да ја ископира оваа рутина на Бејл, но не завршил славно.
„Еднаш се обидов да го ископирам и не поминав добро“, откри Џинас во интервју за англиските медиуми, а пренесува Marca.
Бејл беше член на Тотенхем од 2007 до 2013 година кога се пресели во Реал Мадрид, а кариерата ја заврши пред нешто повеќе од една година во дресот на американскиот Лос Анџелес.
Џинас е икона на лондонскиот клуб за кој одигра 202 натпревара и постигна 26 гола, а фудбал не игра веќе десет години. Денес има 40 години и работи како коментатор за TNT Sports.
Низ целата кариера луѓето кај нас погрешно го изговараа неговото презиме, Џенас наместо Џинас. Истиот проблем го имаше и во Англија, па по некоја година, кога играше за Њукасл, јавно замоли да го викаат Џинас.
„Би ви бил благодарен доколку ме викате Џинас, така се презивам, а не Џенас. Многу ме критикуваат дома затоа што сите ми го грешат презимето. Татко ми кога бил млад се викал Dennis Genas. Но, сакал да го промени за иницијалите да му бидат D.J., како ДиЏеј. Кога сум се родил, ме завеле како Jenas, но изговорот останува Џинас“, во една прилика ја објасни сагата со неговото презиме.
