Интерпол, Европол и шпанската полиција разоткрија криминална организација која ги измамила обложувалниците на необичен начин и тоа по покрената истрага во 2020 година поради серијата сомнителни облози.
Имено, државјани на Бугарија и Романија основале криминална мрежа во Шпанија следејќи различни спортски натпревари во живо со помош на технологија и на тој начин гледајќи го резултатот и што ќе се случи пред обложувалниците да го регистрираат.
Тие тогаш можеле лесно да вршат големи уплати преку интернет и дошле до сериозни пари, а лидерот на организацијата, поранешен бугарски пингпонгар, дури и подмитувал некои фудбалери кои играле за романски клубови.
Европол наведува дека членовите на оваа група најчесто се обложувале на натпревари во азиските и јужноамериканските фудбалски лиги, но и во Бундеслигата, Лигата на нации, Мундијалот во Катар и АТП и ИТФ тениските турнири.
Во полициската акција уапсени се 23 лица, претресени се четири куќи, две се одземени, како и три луксузни возила, два сателита, уред за блокирање сигнал, 47 банкарски сметки, 80 мобилни телефони...
Организацијата била поврзана со други криминални групи низ Европа, а местењето фудбалски натпревари било посебно истражувано во Романија, каде што криминалната мрежа била најактивна.
Водачот на групата на почетокот на септември бил екстрадиран во Шпанија, дел од групата сѐ уште е во бегство, а истрагата не е затворена бидејќи полицијата се обидува да ги идентификува корумпираните спортисти вклучени во целата приказна.
