Научници од Калифорнискиот институт за технологија тврдат дека го откриле изворот за мистериозното цунами што се случи минатата година.
Тој настан ги остави истражувачите во двоумење бидејќи земјотресот што претходеше на цунамито беше премногу длабок (47 километри под површината на Земјата) за да го предизвика.
Минатиот август во Атлантскиот Океан се случи силен земјотрес. Првично Геолошкиот завод на САД извести дека земјотресот бил со јачина од 7,5 по Рихтер, а следниот ден податокот беше ажуриран на 8,2 степени.
Студија објавена во Geophysical Research Letters покажа дека земјотресот всушност бил низа потреси кои се ширеле во текот на неколку минути. Еден од нив имал магнитуда од 8,2 степени по Рихтер и бил само 15 км под површината.
И покрај силата, земјотресот бил скоро „невидлив“ за системите за следење бидејќи бил закопан во сплет сеизмички бранови произведени од други потреси.
Истражувачите веруваат дека „тивкиот“ земјотрес предизвикал цунами кое се ширело на северниот Атлантик, Пацифик и Индискиот Океан, достигнувајќи брегови оддалечени над 10.000 километри.
Иако цунамито било мало и не предизвикало штета, истражувачите акцентираат дека ваквите силни земјотреси може да претставуваат значителен ризик.
