Тренерот на Манчестер Сити, Пеп Гуардиола изјави дека Арсенал ќе направи голема грешка доколку го отпушти тренерот Микел Артета, објавија британските медиуми.
„Би било голема грешка ако го отпуштат. Но, сигурен сум дека тоа нема да се случи и дека имаат доверба во него“, изјави Гуардиола откако Манчестер Сити го победи Арсенал со 4: 1 на вчерашното гостување во четвртфиналето на англискиот Карабао куп.
Артета му беше асистент на Гуардиола во Манчестер Сити три и пол сезони, а пред една година го презеде Арсенал и минатата сезона со него го освои ФА Купот.
Но, оваа сезона Арсенал го доживува најлошиот старт на шампионатот во последните 39 години. Екипата освои само два бода во последните седум кола од Премиер лигата и е на 15-то место со 14 бода.
„Добро ги познавам квалитетите на Артета како тренер и личност. Ова го велам од моето искуство додека работевме заедно во Манчестер Сити и создадовме еден од најуспешните клубови во историјата на Англија. Без него ова немаше да биде можно“, рече Гуардиола и додаде:
„За да создадете нешто, треба време и јас го добив во мојата прва сезона во Сити. Артета ќе го донесе резултатот, само е прашање на време.“
