Синоќа дел од публиката на „Камп Ноу“ го исвиркуваше Жорди Алба откако се појавија гласини дека одбил да прифати намалување на платата со цел да му помогне на глубот да ја преброди финансиската криза. По тој повод се огласи Жерар Пике.
Дефанзивецот инсистира дека сите четворица капитени на Барса прифатиле намалување на платите и дека тоа наскоро и ќе се случи.
„Мислам дека намалувањето е нешто кое мора да се направи. Сакам да потенцирам дека е зборувано со сите капитени на оваа тема и тие ќе го направат истиот чекор наскоро. Прашање е само на време“, вели Пике говорејќи за Movistar.
„Јас морав да бидам првиот да го направи тоа и тоа брзо, поради правилата за регистрација. Но, ние сме фамилија, сите сме заедно, капитените уште од првиот момент имаа намера да се прилагодат на она што му е неопходно на клубот. Тоа е одлука која сами ја донесовме и горд сум на тоа“.
Синоќа Барса го победи Реал Сосиедад со 4:2 на домашен терен, но од дел од трибините доаѓаа свирежи кон Жорди Алба, кој е еден од четворицата капитени, откако претходно се појавија гласини дека одбил намалувања на платата. Барселона е во финансиска криза и тоа е главната прчина поради која се раздели со Лео Меси.
„Понекогаш се случуваат недоразбирања. Во контакт сум со Сержи (Роберто), Буси (Бускетс) и Жорди (Алба) и сите сме на ист став, пробуваме да изнајдеме решение. Имаше неколку часа пред да почне лигата и на клубот му требаше некој прв да намали за да може да регистрира нови играчи, но знам дека и останатите ќе си ги намалат платите“, објаснува Пике.
Во ерата по Меси прв капитен на Барса е Серхио Бускетс, а негов заменик е Жерарт Пике. Трет капитен е Сержи Роберто, додека четврти е Жорди Алба.
„Не треба да објаснувам што претставува Лео, сите знаеме. Тој е најважниот играч во историјата на овој клуб и во историјата на фудбалот. Но, сè поминува, мора да продолжиме понатаму. Мислам дека имаме добар тим, ќе бидеме доста компетитивни. Убеден сум дека ќе се бориме за сите трофеи до крај“, заврши тој.
