Тренерот на „Росонерите“ откри дека користел зборови на славниот кошаркар за да ги мотвира неговите играчи на синоќешниот претпоследен натпревар од сезоната против Аталанта.
Милан синоќа ја извојува петтата победа во низа во Серија А и на едно коло до крајот се наоѓа на само 1 бод од освојување на Скудетото. Синоќа против Аталанта погодија Рафаел Леау и Тео Ернандес во победата од 2:0.
„Аталанта се многу цврст тим и ни создадоа доста проблеми, но одигравме добро во одбраната и им дозволивме многу малку шанси за гол. Сите претходни натпревари нѐ научија дека имаме што ни треба кога станува збор за одлучноста, вербата и храброста. Тие пресврти против Лацио и Верона ни дадоа уште поголема самодоверба, тоа е нешто што ја намалува анксиозноста. Момците знаат дека имаме јаки и слаби страни, па мораме да искористиме најмногу што можеме од нашите јаки страни“, вели Пиоли говорејќи за DAZN.
„На момците им покажав интервју со Коби Брајант, кој при водство од 2:0 во партии во НБА плеј-оф говори како ништо не е готово. И кај нас не е готово. Мораме да останеме смирени и концентрирани, што на крајот може да се покаже одлучувачки“, додава.
Доколку Милан не загфуби наредната недела кај Сасуоло, Стефано Пиоли ќе го освои своето прво Скудето во кариерата. Милан е 12-ти клуб што го води овој 56-годишен стратег, а во својата кариера нема освоено ниту еден трофеј, било каков. Претходно ги водеше Салернитана, Модена, Парма, Гросето, Пјаченца, Сасуоло, Киево, Болоња, Лацио, Интер и Фиорентина. Во Милан е од октомври 2019 година.
„Кога дојдов во Милан тимот имаше тотално различни тактички идеи и концепти, па морав да менувам сѐ. Сега добрата работа е што играчите уживаат искористувајќи ги нашите јаки страни и подготвувајќи се тактички, кадарни се да се прилагодат и воедно да ги ограничат противниците“, заврши Пиоли.
Како играч го има освоено Скудетото во сезоната 1985/86 со Јувентус, а истата година го освои и Купот на европските шампиони (денес Лига на шампиони), како и Интерконтиненталниот куп.
