Претседателот на Европскиот парламент, италијанскиот социјалдемократ Давид Сасоли, почина синоќа во Италија на 65-годишна возраст, соопшти неговиот портпарол.
„Давид Сасоли почина на 11 јануари во 1:15 часот во CRO (Онколошки референтен центар) во Авијано, Италија, (северно од Венеција), каде што беше хоспитализиран од крајот на декември“, објави на Twitter Роберто Куило, портпарол на Сасоли.
„Датумот и местото на погребот ќе бидат објавени во наредните часови“, додаде тој.
Вчера тој соопшти дека претседателот на Европскиот парламент бил хоспитализиран од крајот на декември „поради сериозни компликации поради дисфункција на имунолошкиот систем“ и најави откажување од неговите службени активности.
Поради тоа што во минатото боледуваше од леукемија, Сасоли веќе беше хоспитализиран оваа есен поради пневмонија, што го оддалечи од Европскиот парламент неколку недели.
Сасоли, поранешен новинар, беше на чело на парламентот во Стразбур од 2019 година. Неговиот мандат заврши овој месец, на половина од петгодишниот мандат на законодавниот дом.
Изборите за негов наследник се закажани за 18 јануари.
Неговите Социјалдемократи, втората политичка сила во Европскиот парламент, во средината на декември се повлече од номинирање свој кандидат, отворајќи го патот за кандидатката на ЕПП (десница), сегашната прва потпредседателка на парламентот, Роберта Мецола.
