Трикратниот освојувач Новак Ѓоковиќ нема да добие ослободување од вакцинација за претстојниот УС Опен, што значи дека неговиот настап на завршниот Грен слем турнир во сезоната е доведен во прашање.
Според сегашните правила, невакцинираните странци не смеат да влезат на територијата на САД. Единствената можна причина за ослободувањето во кое би можел да западне Ѓоковиќ е „посебниот интерес“ за негово влегување во земјата.
Сепак, според The New York Times, Тениската асоцијација на САД (УСТА) нема да бара од властите изземање за српскиот тенисер.
„Ќе ги следиме владините регулативи и Центрите за контрола и превенција на болести (ЦДЦ)“, рече извршниот директор на УСТА, Лу Шер.
Поради истото правило, Новак оваа сезона не можеше да игра на два турнира од Мастерс 1000 во САД, Индијан Велс и Мајами. Конкретно за УС Опен, има уште време правилата во САД да се променат бидејќи турнирот започнува на 29 август.
Минатата година Ѓоковиќ играше во финалето во Њујорк, каде загуби од Даниил Медведев.