Францускиот фудбалер Пол Погба добро ќе го памети 15 март бидејќи неговиот Манчестер Јунајтед во вторникот вечерта беше елиминиран од Лигата на шампионите, а малку подоцна доживеа вистинска семејна драма.
Имено, додека тој се борел со соиграчите за да постигне што подобар резултат на реванш натпреварот од осминафиналето во Лигата на шампионите против Атлетико (0:1), крадци упаднале во куќата на Погба.
Французинот останал запрепастен кога дознал за немилиот настан бидејќи во неговиот дом тогаш биле само нивните бебиња.
„Нашето семејство го имаше најлошиот кошмар минатата ноќ кога крадци упаднаа во нашиот дом додека бебињата спиеја во нивната соба. Крадците биле таму само 5 минути, но одзедоа нешто многу повредно од сѐ што имавме во нашиот дом, и тоа е чувството на сигурност. Тоа се случи во последните минути од синоќешниот натпревар кога крадците знаеја дека не сме во нашиот дом. Сопругата и јас побрзавме дома не знаејќи дали нашите деца се безбедни и неповредени. Како татко, нема полошо чувство на светот од она кога не можете да ги заштитите своите деца. Искрено се надевам дека никој никогаш нема да мора да го почувствува тоа што јас го чувствував“, напиша Погба синоќа на социјалните мрежи.
Францускиот играч за врска на крајот од своето обраќање понуди награда за секој кој ќе му помогне со информации за грабежот.
