Безбедносниот полициски робот што њујоршката полиција го стави во употреба за да патролира на метро станицата кај „Тајмс Сквер“ повеќе не е оперативен, што предизвика многу прашања, критики, па дури и мемиња.
Њујоршкото метро е познато по многу повеќе од роботи, и се чини дека така ќе остане. Безбедносниот патролен робот на њујоршката полиција, кој изгледа како нешто помеѓу R2-D2 и Dalek, а го доби името К5, требаше да патролира по станиците на метрото, да открива закани и да им помага на патниците на кои им е потребна помош. Роботот беше дел од визијата на градоначалникот на Њујорк, Ерик Адамс, за „иновативни полициски технологии“ кои ќе го направат градот побезбеден и „попаметен“.
Сепак, по краткиот и неимпресивен престој на станицата „Тајмс Сквер“, роботот е повлечен од служба.
К5 за прв пат беше претставен на јавноста на прес-конференција во април 2023 година, кога се движеше низ сцената и трепкаше со сините светла. Адамс го пофали, велејќи дека тоа е „добра инвестиција“, што го чини градот само еден долар на час, што е помалку од просечната часовна стапка. Градоначалникот се фотографираше со роботот правејќи облик на срце со рацете. Сепак, роботот не возврати бидејќи има „ниту раце, ниту емоции“.
Од друга страна, К5 предизвика различни реакции кај њујорчани, некои беа љубопитни, а други нервозни. Исто така, некои се обиделе да стапат во интеракција со роботот и го притискале копчето за помош, други правеле селфи фотографии, додека имало и такви кои го вандализирале, клоцале и гаѓале со ѓубре. Исто така, имало и такви кои целосно го игнорирале, како и други работи во градот.
Роботот се соочи со технички предизвици како што се навигација по скали, избегнување пречки и одржување на постојана работа. NYPD мораше да назначи службеници да го надгледуваат роботот и неговите перформанси, со што ја загуби смислата да има автономен уред.
Тест-периодот на метро станицата „Тајмс Сквер“ заврши во декември по шест месеци и оттогаш роботот стои неподвижен во излог, одделен од јавноста со стакло.
Портпаролот на полицијата изјави дека програмата за тестирање е завршена и дека резултатите се проценуваат, но не кажа дали роботот повторно ќе биде во функција или ќе му биде вратен на производителот Knightscope. Додаде дека администрацијата на градоначалникот секогаш бара нови технологии за подобрување на јавната безбедност и заштеда на пари. Рече дека роботот „работел“ во смена од полноќ до 6 часот наутро и дека градските власти размислуваат за следните чекори.
Градоначалникот претходно рече дека роботот нема да користи технологија за препознавање лица, контроверзна карактеристика што предизвика загриженост за приватноста и човековите права. Сепак, тоа не ги смири критичарите кои тврдеа дека роботот симболизира угнетувачка и дистописка состојба на надзор.
