Сега е официјално: Apple објави кога ќе ги претстави уредите од серијата iPhone 15.
Малку настани привлекуваат толку внимание како премиерата на новите iPhone. Од лансирањето на претходната серија, на интернет кружат гласини и внатрешни информации за моделите од серијата iPhone 15, а сега се знае кога ќе дознаеме што било вистина, а што не - Apple официјално ја закажа премиерата за 12 септември.
Наречен Wonderlust, овој настан, како и минатата година, ќе се одржи во кампусот на гигантот од Купертино, во амфитеатарот „Стив Џобс“, со почеток во 19 часот по македонско време.
Се очекува овој пат да добиеме четири нови модели на iPhone - iPhone 15, iPhone 15 Plus, iPhone 15 Pro и iPhone 15 Pro Max (можеби Ultra). Редовните модели ќе пристигнат со екрани од 6,1 и 6,7 инчи, а истите големини се очекуваат и на Pro телефоните. Гласините велат дека најголемата промена што ќе ја видиме кај обичните модели е заминувањето на засекот, односно имплементацијата на технологијата Dynamic Island, исечок во облик на таблета на екранот што ја чува селфи камерата и FaceID препознавање на лицето, што компанијата го претстави минатата година на моделите на iPhone 14 Pro.
Новитетот што го носат моделите Pro е освежен дизајн, нови материјали и најтенки рамки за екранот на пазарот. Наводно, рамките на телефонот веќе нема да бидат рамни, туку ќе гледаме заоблени рабови кон задниот дел, а гласините тврдат дека Apple конечно успеал да исполни нешто кон што се стреми со години, односно да направи телефон изработен од титаниум.
Уредите на iPhone 15 Pro се единствените што го добија најновиот Bionic A17, за кој се тврди дека е првиот чипсет изграден на процесот на производство од 3 nm. Има тврдења и за подобрен сензор за главната камера, но она што е уште поважно е додавањето на модул за перископ на моделот Pro Max, кој ќе им овозможи на корисниците оптички да зумираат 5 или 6 пати.
Она што е речиси потврдено, а несомнено ќе биде многу контроверзно, е отстранувањето на прекинувачот за исклучување на звукот што е на iPhone од самиот почеток. Наместо тоа, корисниците ќе видат ново копче чија функционалност сами ќе ја приспособат.
Apple ќе го пренесува настанот Wonderlust преку YouTube, официјалната веб-страница и преку апликацијата Apple TV.
