Првиот самостоен напад на вештачка интелигенција, „робот убиец“ врз човек, е регистриран во Либија, според извештајот на ОН кој протече во јавноста. Во извештајот се наведува дека во март 2020 година во судир меѓу либиските сили и одметната воена фракција, автономен авион следел човечка цел и ја нападнал.
Нема потврда дали нападнатиот војник бил убиен, но фактот дека беспилотното летало само одлучило да нападне е доволно загрижувачки.
Бројни експерти и научници со години предупредуваат на ваквото сценарио и повеќепати бараа да се запре развојот на овие „роботи убијци“, односно роботи и технологија што би работеле целосно самостојно на бојното поле.
Освен фактот дека ваквите роботи можат да направат грешки и да ја нападнат нивната армија или цивили, најлошото можно сценарио е и она во кое таквите автономни роботи би можеле да се побунат и да се обединат против луѓето.
Беспилотното летало користено во Либија е направено од турската воено-технолошка компанија STM, а станува збор за моделот Kargо 2, кој е опремен со експлозив и може да биде насочен кон метата како камиказа.
Но, освен фактот дека со овој дрон можат да управуваат луѓе, уредот има и „високо ефикасен автономен режим“, и е програмиран да напаѓа цели дури и во случаи кога не е поврзан со операторот од земја, т.е. може да се движи и напаѓа целосно самостојно.
Зак Каленборн од американскиот национален конзорциум за проучување на тероризмот и негов одговор при Универзитетот во Мериленд истакнува дека ова навистина може да биде првиот случај во кој беспилотно летало самостојно нападнало луѓе.
Тој наведува дека системот за препознавање на предмети не е сигурен, а слично размислува и неговиот британски колега Џек Вотлинг, кој за Fox News изјави дека дискусијата за „роботите убијци“ мора да биде „итна и важна бидејќи технологијата и нејзиниот развој нема да чекаат луѓето да се усогласат“.