ПСЖ славеше со убедливи 3:0 кај Марсеј во натпревар од 25-тото коло од француското првенство, но доживеа нов пех.
На таа средба парижаните ги снајде нова неволја. Лошата вест е сериозната повреда на дефанзивецот Преснел Кимпембе.
Во 15-тата минута тој спринтираше кон својот гол за да спречи напад на ривалот, околу него немаше никој кога се сруши урлајќи од болка. Кимпембе ја обнови повредата на Ахиловата тетива, поради која не играше во последните три месеци.
Покрај оваа сериозна повреда, која сега ја обнови, Кимпембе пропушти дури 21 натпревар сезонава поради повреди на тетивата и листот.
Тренерот на ПСЖ, Кристоф Галтје, потврди дека Кимпембе нема да му биде на располагање на тимот до крајот на сезоната.
„Тој ќе биде надвор од теренот до крајот на сезоната. Веднаш знаевме дека станува збор за многу сериозна повреда“, рече Галтје.
Пари Сен-Жермен потврди дека Кимпембе ќе отсуствува најмалку 4 месеци, но сериозноста на повредата допрва треба да се утврди по детални прегледи.
Претходно ПСЖ го загуби и Нејмар, а моментално во аут се и Ашраф Хакими и Ренату Саншеш.